BABAD BRAHMANA CATUR

1.b.     

Aum awighnam astu nama sidyam.

Aum diwiam datra bedaya namaskaranam. Twam nugraham samahite. Tar pragiam dipataka sudastu niscalam. Sarwa karma sidiate. Aungkaram candra Siwayam astraya waranam. Kresna turjasca wisakiam . Sonitam buja murda sujitam artanam. Satastian sahasrane. Wiantaram windu dwaya jiwitam mahalokam. Taspatiam citra soditam.

Kartawiam Brahmasargah donika niscatam. Langganiam pinda sidiate. Ewatam sagarcana sarwajnya wiratim. Samakiam nasca widiatam. Bedakwan namo tarasiam nascaya kusara. Sakiliasca wratmane nama siwaya.

Sembah ing hulun ri pada dwaya Bhatara Catur Muka,sira anugraha ri kajagaditan ing hulun, sidan ing saprayo jananya tan kawignam, amerdiaken miketang kata Brahma kula sargah hulun angujaraken Purwa tattwa Brahma-

2. a. Wangsajan ira ngkaneng Ongkara Candra Swarastrayana, patemon ing Kresnajnyana Caturmasa Dasa ya, swanitan ingbuja murda asuji ta ya, sirakaniya sahasra walungatur tigang puluh tiga. Mangkana wilangnya jiwitan ikang sarat.

Irika diwasan ing mrakertang Brahmanakulasargah, sinayutan den ing Sang Paramosuditaya, sarika ri purwa ira Bhatara Brahma, tekeng kulawangsa ira ring loka, ya tika sumidia inajaraken ing hulun. Ndia slokan iram nihan.

Tito Sunia  Mahalokam, Naca Dewaya Tamasca, Tama Yogam Nasiatanca, Sita Yogam Narasdewi, Naca Brahma Sayogasca, Apica.

Kunang pwa ya ring asitkala, tambian ing turung ana sarwa loka kabeh, ana pwa ya Sang Hyang Atama ngaran ira, sira purwan ing ekabuwana, makakranan ing Brahmandayoga sira, temben ing ana Sang Hyang Brahma, purwan ira mijil saking Sang Hyang Atma ;

2. b.     Kunang ring urdan ira, tan tattwa ya. Kunang purwan ing yogan ira Sang Hyang Atama ngaran ing ndia ta,/nihan. Mayoga pwa sira Sang Hyang Atama, ana pwa sira Sang Hyang Sitadewa, Mayoga pwa sira Sang Hyang Sitadewa, ana pwa Sang Hyang Naradewa, Mayoga pwa sira Sang Hyang Naradewa, ana pwa Sang Hyang Tunggal, Mayoga pwa Sang Hyang tunggal, ana pwa Sang Hyang Ratnamaya,Mayoga pwa Sang Hyang Ratnamaya, mijil pwa Sang Hyang Brahma, sarika pwa sira kabeh pada umangenakena yoga, amardiaken pangisin ing sarwaloka. Wus genep pangisin ing Mahaloka, atisaya treptin ikang sarwa loka kabeh.

Pira kunang antajin ikang Mahaloka suda sahita, mangke prapta gantan ikang Sangara kalpa, ndia slokanya, nihan :

Sangaratam Mahaloka, Rudrancagni basmitiam. Sunya taya andakaram, ekabuwanasca distitah, apica.

3. a. Kunang ri wekasan tikang Mahaloka, sinangara de Sang Hyang Agnirudra, basmibuta ikang trimandala, wastu sunia mameng angaluwung, peteng pepet ikang buwana kabeh.

Sarika pwa sira Bhatara Ekabuwana anguduh Sang Hyang Caturmuka, amerdiaken tikang Mahaloka, ya pwa kadi ring buwana, dadiakenang tikang loka Brahmandabuwana sahita, gawe Sang Hyang Brahma, kaping rwa ira amintonakna kasidiajnyanan ira, amrakertang buwana kabeh, anguripakenang buwanarwana adri kunang-kunang, apan moksatmaja swabawa, muwah abiakta param Brahma ngaranya waneh, rikana pwa Sang Hyang Brahma inaranan Sang Hyang Antakala Rudra ira waneh.

Mahyun pwa sira manresti jagat, rikana pwa sira Sang Hyang Brahma mwah

Teher pwa sira gumawe yoga, rep kasidiajnyanan ira, ana mijil sakeng yogan ira, asura, gandarwa, buta, kala, yaksa, pisaca, raksasa, naga, paksi, tiryak.

3b. Tan genep pwa sresti Bhatara, mayoga pwa sira mwah, mijil ta Sang Hyang Resi tigang siki, pratiekan ing aranya. Sang Hyang Ndanana, Sang Hyang Sanakumara, sira rakwa Brahma sama guna mwang saktin ira.

Maksih pwa ri kana nda pwan taqn genep pangisin ikang andabuwana, mayoga pwa sira mwah, rep sandin ing adnyanan ira, amijil saking suryadwara Sang Hyang Brahma, Sang Dewarsi-nawa kwehnya.

Mangke mwtu mangke matuha, sama putus ing ajnyana,Rsi Sidawakia sira, pratiekan ing aran ira lwirnya : Bagawan Marici, Bagawan Bergu, Bagawan Anggira, Bagawan Pulastia, Bagawan Pulaha, Bagawan Kartu, Bagawan Atri, Bagawan Wasista, Bagawan Daksa, sira Dewa Rsi pada(-)agmimaya sira.

Sarika pwa Sang Hyang Brahma an pakanak Sang Hyang Parameswara, teher ikana sira inaranan Sang Hyang Pitamaha.

4. a. Maksih pwa tan genep pangisin ikang tribuwana, mayoga pwa sira mwah, rep sidin ing yogan ira, ana mijil kukus maorageni saking (---) ing suksmajnananya ira, tibakna maring kundi manik ing ajnyana, atemu Ongkara, dadi amerta. Pinrayoga pwa ya den ira, mijil pwa atemah rare laki-laki sawiji, samangke ana samangke matuha, putus ing sarwajnyanan ira, sira inaranan Sang Dwijendra, Sang  Mpu Rajakerta ngaran ira waneh, sira anganaken rare rwang siki, sang inaranan Bubuk Sah Gagak Aking, kang amerdiaken Siwabudakula ring bumi keling, pinaka guruloka ing kana.

Maksih pwa tan genep pangisin ikang andabuwana, mayoga pwa Sang Hyang Brahma mwah, rep kasidianjnyanan ing yogan ira, saksana mijil Dang Hyang Mahadewa, saking tungtung sari-sarin ing suksma, sandin ing ajnyanakawisesan ira Batara Brahma, mangke mijil Werda, sudajnyana sidawakia

4b. Sira, Brahma sama guna mwang kasaktian ira, sira kinon de Bhatara Brahma amerdiaken Brahma Jinakula ring Medang Baratawarsa. Gumawe werdian ing Brahmakula.

Rep mayoga Dang Hyang Mahadewa, sidin ing yogan ira, saksana mijil tang kukus saking tungtung ing bajrajnyanan ira, atemah bayu kama, tiba ring ajeng ing yogan ira, pinratista tikang bayu kama, menget atemah rare, mangke mijil mangke matuha.

Neher inaran sira Dang Hyang Bajrasatwa. Apan mijil saking tungtung ing bajrajnyanan ira Dang Hyang Mahadewa, atisaya kemahatmian ira ring loka, sama ring Dang Hyang Mahadewa suguna mwang kasaktian ira.

Kunang sira Dang Hyang Bajrasatwa, kinon mayoga de Dang Hyang Mahadewa, amerdiaken jinekula ring Yawadwipa. Mayoga pwa sira, rep sidin ing yogan ira, mijil tikang mayan ing ajnyana saking tanu angedap, kadi pahesan.

5a. Pinrayoga tikang maya, wastu atemah rare, mangke ana mangke werda.

Neher inaranan Dang Hyang Tanuhun, atisaya kotaman ing kasteswaryan ira, sama mwang Sri Dang Hyang Bajrasatwa guna mwang saktin ira. Kunang sira Dang Hyang Tanuhun, kinon de Dang Hyang Bajrasatwa mayoga, amerdiaken kula ring Yawadwipa.

Mayoga pwa sira Dang Hyang Tanuhun, rep sidin ing yogan ira, ana bayu maor geni, mijil saking sandin ing yogajnyanan ira, dadi kukus atemah amerta, inurip atemah rare. Mangke ana mangke matuha, sira warah tan pinadan, neher inaranan sira Dang Hyang Mpu Pradah, atisaya kasidiadjnyanan ira ring loka.

Sira pinaka usadi ring bumi Baratawarsa, sama lawan Dang Hyang Tanuhun guna mwang saktin ira, sira sinung nugraha de Bhatara, amratistakna pinaka sadin ikang tribuwana ring Medang Baratawarsa.

Sira kinon de Dang Hyang Tanuhun mayoga, amerdiaken kulawangsan ira.

5. b. Mayoga pwa sira Dang Hyang Mpu Pradah, mijil sang rare saking baula yogan ira, Mangke ana mangke matuha, Baula ngaran luwih, sira mijil saking kotaman ing yoga sandi, saking sandin ing adnyanan ira, neher inaran Dang Hyang Baula, pira ta kotaman ing kasidiadnyanan ira ring loka. Sama lawan Dang Hyang Mpu Pradah guna mwang saktin ira.

Sira kinon de Dang Hyang Mpu Pradah mayoga, amerdiaken kulawangsa ira ring Medang Baratawarsa. Rep mayoga pwa sira, sidin ing yoga, saksana mijil tang rare saking suniyadnyanan ing yogan ira, mangke ana mangke matuha, putus ing sarwa adnyana, tan tularan kotaman ing kapanditan ira, wagmimaya sira.

Teher inaran Dang Hyang Tantular, apan tan keneng tiniru kaparamartan ing adnyanan ira sama lawan Dang Hyang Baula guna mwang kasaktian. Tan wuwusan kasteswaryan ira ring loka, ginakara sira Hyanging soka ka-

6. a. Sihasih, Dang Hyang Asokanata ngaran ira waneh.

Sira Dang Hyang Tantular, kinon den ira Dang Hyang Baula amerdiaken Jinakula ira ring Yawadwipa. Mayoga Dang Hyang Tantular, rep sidin ing yogan ira, mijil ta ya maya caturwarsa saking tungtung ing sunyadnyanan ira, apupul atemah tunggal. BERSAMBUNG