TENUNG PEWACAKAN WETON

TENUNG

PEWACAKAN WETON

Redite Pahing Wuku Sinta

Dora, Tungleh, dangu, Sri.Urip 14, lintang gajah, nga, wikan, prewira, kweh putra, kweh wang tan suka, Laku bulan, nga, wikan mekarya, uripnyane ledang, katresnain wang, budi alus, sada mayus. Pasemunya burancah, jajarih,tuhu kumel, momo manahniya, Bala manahniya, bocah semuniya, ganjah polahniya, gancang awakniya, cidra manahnya, angkara, karepniya aluna ring wang, sanake gawena, sredah manahnya, sebelan, semu urungan, semu suka karepniya, dengen ujarnya, sada danguh ambekniya, riget manahniya.

Dewaniya Bhatara Indra, muwah Bhatara Brahma, kalaniya sira Sang Doro Kala, butaniya Sang Buta Catuspata. Ngawe gering makweh, luwirniya : langu, gerah merapah, panestis, lesu, ngibuk, kahangan, borok, edan, ngedoh-doh.

Banten ring Paibon : beras 5 catu, arta 500, benang, taluh, nyuh, biyu, sami sarwa 5, mewadah sok, medaging mas, sasayut kesumajati, nga, luwirniya : sega putih mewadah dulang, iwakniya sata putih, pinanggang, mapecel mica genten, sekar putih sarwa 5, raka woh jangkep, kramaning sasayut.

Banten ring Kamulan luwirniya : Penek agung metatakan jinah 99 keteng, iwakniya sata wiring, pinanggang, jajatah calon, rumbah gile, gagodoh tumpi, raka woh jangkep. Utangnya sasatun 1, beras denagenep, arta 9009, mewadah sok, mapupuk sekar jangkutan, ayat Sang Sedahan Semaya.

Banten ring Paturon luwirniya : sega sapunjung agung, iwakniya katupang agung, balung gegending, jukut lembayung, sambel kameri, raka woh jangkep, ayat sira Sang Indung Bajang.

Banten ring dalan marep kelod, luwirniya : penek 1, iwakniya sata kelawu brahhma, pinanggang, raka woh jangkep, ayat Sang Buta Pangkah.

Mebayuh ring natar maiter antuk geni 14 linting, toya anakan 14 kecoran, saha brata pepanganan, tan wenang mangan ulam julit, ulam kakya, muwah jangan beligo waluh, elingakena, aywa lupa.

Coma Pwon wuku Sinta.

Waya, aryang,dangu, Indra. Urip 11, lintang kiriman, nga, setata sedih antuk pekardin anak liyan. Laku Arastuding, nga, perewira, seneng ring arta brana wang liyan. Dengen ujarnia, sada danguh ambekniya, riget manahniya, dahat peambekaniya, arda manahniya, wijih manahniya, mendra ambekniya, maroken gawe, lancing memuniya, wisaya manahniya, amangan karepe gawe, ana rowangniya, apungut rasa. Tuhu ayu manahniya, wredhi druwe jajanihan.

Dewaniya Bhatara Mahadewa, muwah Bhatara Coma, kalaniya Sang Kala Gajah Jerang, butaniya, Sang Bhuta Ulu Kebo, ngawa gering makuweh, luwirniya, borok, koreng, parang, anyang-anyangan, hnek ati, sula, rumpuh, gendeng-gendengan, lara ring waduk, lesu, ibuk.

Banten ring Paibon luwirniya, beras 4 catu, arta 400, benang, taluh, nyuh, biyu, sami sarwa 4, mewadah sok, medaging perak, sesayut Citarengga, nga, luwirniya, sega ireng mewadah dulang, iwakniya sata ireng pinanggang, mapecel, mabasa mica genten maulig, mapupuk sesawur, raka woh jangkep kramaning sasayut.

Banten ring kamulan luwirniya : sekul pucukulak, jangan kekara, jatah calon 7 katik, gegodoh tumpi, sata putih pinanggang, raka woh jangkep. Utangniya sasantun 1, arta 7007, mawadah sok, mapupuk sekartaru sakti, ayat Sang Sedahan Semaya.

Banten ring Paturon luwirniya : sega penek 1, iwakniya rempah waduk, jajatah calon, raka wohan jangkep, ayat Sang Indung Bajang.

Banten ring dalan mangulon luwirniya : sega sapunjung agung, iwakniya sata buwik pinanggang, jatah calon 7 katih, rumbah gile, gagodoh tumpi, raka woh jangkep ayat Sang Buta Angawan, ngaran.

Mebayuh ring tepining segara, mesrana toya anakan 11 kecoran, aywa korup,  saha brata pepanganan, tan wenang mangan ulam kebo muwah ulam celeng belang ikuh, elingakna aywa lupa, aywa murun brata iki, apan ala palaniya yan sira mamurug.