BABAD PASEK

BABAD PASEK

Turunan Lontar                   : Gedong Kirtya

Druwen                                 : Singaraja

Nomor                                   : Va.963/6

Antuk                                     : I Ketut Windia

Katureksan antuk               : I Ketut Suwidja

Ketik Malih Antuk               : Ni Made Sariani

Tanggal                                : 4 Juli 1988

---------------------------------------------------------------

1.b. Om Awigenamastu nama siwa ya. Paksa pengaksamaning nghulun de Bhatara Hyang Mami, singgih ta sira Hyang, alungguheng sunia taya, tabe-tabe pwang nghulun, de Bhatara Hyang Kabeh, cinitra mungguwing lepihan, sira sang inugraha, anawaka purwa sang wus lepas, luputa tan hana ring tulah pamidi de Hyang Mami mwang ring wigrahaning mala, papa pataka, tan katama upadrawa wastu wastu wastu paripurna anemuwaken rahayu tekeng kula sagotra, mwang santana, namastu jagaditha ya Sang ginelar Ong karatna mantram, hredayam masu nirmalam yogi swaram.

Uni riasitkala, duk tan kumelencong bhumi Bali lawan Silaparang, kewalia hana gunung

2.a. maring Bali, ring Wetan Gunung Lempuyang, ngaran, ring Kidul Gunung Andakasa, ngaran, ring Kulwan Gunung Watukaru ngaran, ring Lor Gunung Mangu ngaran. Ri mwah hana Gunung Bratan, ngaran. Nimitania ingan den ira Hyang Ari Bhawana, sadakala njong genjong ikang bhawana, yatika matangian paduka Bhatara Hyang Pasupati kapiwelas hyun tumon ring ulaha ning sarat, sadnya Bhatara amupak parawanikang Giri Hyang mahameru, kumelaken mareng pulina Bali tekeng Silaparang, sira ta Badawang Nala, kinon ta bungkahi parwata, Sang Anantaboga papareng Sang Naga Basukih, maka bandanikang parwata, Sang Naga Taksaka umiberaken, tumurun haneng Bali, malaning we, Siwa Sura Uttama Mrakya, Awidya Titi Wot Masa, Kresna Paksa, tekeng Panca Dasi, Kala Rudira Bhumi Mastakeng Witangsu I-

2.b. sakam  ooo o o o o o o o o o o, duking mangkana rimba ikang eka tang bhumi Bali ngaran,  Eka Windhu, arawas lawas punang kala, prapta yasaning rat ri sandintenya, Siwa Kawyawara, uttamaning uku ning Tolu, Candra Sira, Titi Sukla Paksa, Pawana Sitangsu, Rudira Parwata, Sirsa Widyut, Wesaka Sunya Pandita, warsaning jadya, 7, praptang udan madres, sinung riyut, genter pater, saha kilap tatit, lindunikang rat, saha klepug, rwa ulan lawasnia udan, wekasan mekeplug giri ayanging Tolangkir, mijil tang Salodaka ngaran. Ri wusing mangkana, pira kunang antajin ikang kala, praptang di we, Siwa Kuye, Wara Kuda Olih, Sasadara Ratu, 5, sukla paksa ping panjodara bhumi, ti, ngaran swanita, kretya mastaka witangsi 1, wesakam, Gni Bundara 31 tahunya. Mwah makeplug ginggung Giri Tolangkir,

3.a. mijil paduka Bhatara Hyang Putranjaya, tumut arinira, Bhatari Dewi Danu, tumurun wanteneng Basukih, tineher rakwa aparhyangana ring Giri Lempuyang, mangkana katattwania nguni ring asitkala duking adan pamargan Bhatara Tiga, kinon dera Hyang Pasupati, ling Bhatara nguni, kamung anakku Mahadewa, nidaku Gnijaya, nora waneh anakku mangke tumurun haneng Bali, maka sinembahaning pulina Bali. Mangkana wetyanira Hyang Pasupata angastungkara Bhatara Tiga, adulur pangalpika ndah umatur Sang Hyang Tri Purusa :

            “Singgih Paduka Hyang Mami dudu saking aniwal

3.b.     adnya Paduka Bhatara nimitana nghulun karya lare, tan wring margaha”.

Sumahur Hyang Pasupati, ling ira :

“Anakku, aja walangati, inghulun kerta lugraha, sida sidhi adnyananta, apan kita anakta mangko”.

Riwusing mangkana, tineher Bhatara Tiga sinung yoga pinerastista sinuksma ri olih taktakan yeh gading, lumaku Hyang Tri Purusa, awan maring soring arnawa, cet maring Giri Hyanging Tolangkir, aparahyangana ring Basukih, mangkana pidartania ring Usana

Pira kunang antajinikang kala, renos parahyangan ira Bhatara Tiga wenten ring Bali Kayangan, tan ucap dateng ring we, kaye siwa julung arik, sasadara marga  uttara badrawada, titi pratipada sukla, swanita pawana budara, swanita anga bhumi, sirsa jadma, wesaka    naga wulan witangsu

4.a. udaning naga dita, ya tika Bhatara kalih Hyang Mahadewa papareng lan Hyang Gnijaya, mayoga ring parwateng Tolangkir, mwah mekaplug Giri Tolangkir, wetu blabur geni saking sidhi adnyanan ira Hyang Genijaya, duking mangkana ingaranan Embah Luwah Gni, katama pitakaning mangke. Mwah Bhatara Gnijaya mayoga, mijil putran Bhatara saking Panca Bayu, 5, kan panuwa abhiseka Sang Brahmana Pandita, ngaran, arinira akakasih Mpu Mahameru, ngaran, mwah sang anwam akakasih sira Mpu Gana ngaran. Mwah sang ing wekas apuspata sira Mpu Pakuturan ngaran. Mwah arinira sang ing panguntat, atengeran sira Mpu Pradah, paling alit, ngaran. Telas umantuking Giri Semeru, sama angawangun yogha draka ngastiti Bhatara Hyang Pasupati, tangeh yan kata-

4.b. kena, heneng ikang kata sakareng.

Mangke mwah winalia ikang kata, wasita payogan Bhatara Hyang Mahadewa ri parwata Tolangkir, umijil purta saking Rwa Bhineda, 2 siki, jalu sawiji, setri sawiji, sang jalu apuspata Bhatara Gana, sang ari stri, apenelah Bhatara Manik Gni, malar sira kumolaken umantuking Giri Semeru, ayoga semadi deraka, angesti Hyang Pasupati, pirang warsa mareng Giri Semeru, teher ingalap rabi de Hyang apenelah Brahmana Pandita lawan Bhatari Manik Geni, neher ginantya ikang puspata, mangke paesadnya Mpu Genijaya, ngaran, kojarnia ring Usana.

Hana wuwusan muwah, putran Bhatara Hyang Pasupati, saking Giri Mahameru

5.a. 4 siki, saking piturunira Bhatara Pasupati wenten ing Bali Rajya, siniwi dening wong Bali kabeh, mangiring Bhatara Hyang Putranjaya mwang Bhatara Genijaya, hyanging pat, akakasih Bhatara Tumuwuh, aparhyangan ring Giri Watukaru ngaran.Mwah Bhatara Manik Kumayang aparahyangan ring Giri Beratan, ngaran, mwah Bhatara Hyang Manik Galang aparahyangan ring Pejeng, ngaran, mwah Bhatara Hyang Tugu aparahyangan ring Giri Andakasa, ngaran, sama mayoga semadi, sinungsung wong Bali Raja, anucapa kalewihaning parahyangan ira, mangkana pidartania Bhatara

5.b. naring Bali akayangan, wus inerat dera Padanda Sakti Dwijendra Wawu Dateng, mangkana kacarita.

Wasita mwah mangkaya niti wakyanira, paduka Bhatara Hyang Pasupata maring Giri Yambu Dwipa ring sira para Mpu Makabehan, paran luwirnia, nihan :

“Putungku makabehan, rengwa akena udesa nghulun ring sira kabeh, apan sira anugrahe kita, kita turun wantening Bali, apa sang hana    yoga, umiring Hyang Tri Purusa”

Mangkana wakya Bhatara Pasupati, atar lina Bhatara, teher anganjali sira Mpu Kabeh, lewir kasiratin Sanjiwani, karostyaning idhepnira sumusup tekeng antya hredaya, luwir lahru kang katibeng jawuh, mangkana yan paumpama, tangeh yan wasitakena ri wusing mangkana, titanen turun ira Sira Mpu Mahameru, mahawan hyun tanpa amengan wenten ing Bali prapta maring Kutul Gading iku, lumintangi Giri Tuluk Biu, jumujug maring Besakih, umedek maring kehanan ira Paduka Bha-

6.a. tara Putranjaya, teher pwa sira ingkana aparhyangan, anangun yoga samadi, tan pengan karestyaning parahyangan ira, marapwa angajawa, angabali, mangkana katattwanira.

Heneng ikang kata, Mpu haneng atita, ginatyaken carita, wuwusen sang atapa ring paswanikang tolangkir, wijilira Sang Ratu Bali, jumenengana maka panguluning Baliaga, wijilira sinuksma ring tata kalapa tinuduh de Hyang ajadma, pinuter dening pedang, ri wus pinulira, pineresikan aganti puja stawa ring wijilira, bhiniseka Sri Aji Masula-masuli antya restyanikang bhawana apan amanggehaken kaparamartan, stiti ring Dewa mwang pitra tarpana, pira lawasnira amukta  sraya, pada moktah sira ring antraya tan pakalewaran, hana sutanira

6.b. sumendi ri ya, anama Sri Aji Gajah Wahana, malar twi pingan kawemendi raja, mur pwa sira ring acintya, gumanti anakira sumendyeng prabu, abhiseka Sri Aji Jaya Pangus, lewih sukretanikang bawana lwir Wisnu atmaka ya pakopama, pirang warsanira sumendya raja, mur moksah sira, mwah gumanti anakira, sumendiya amundering Bali, lewih kajiyapnian nira amnggehaken kaparamertan, pira antaji nikang kala amakweng bhuwana, akakasih Sri Aji Ken Angrok, suwening nata, mur ta sira, irika mwah anakira gumanti prabu, abhiseka I Dewa Enggong, maler tan sipi resti nikang praja, wisnu murti ngawatara, pira lawasnia amukti ikang praja

7.a. mandala, mur sira ring acintya, gumanti mwah anaknya, abhiseka Sri Aji Mayadanawa, mangkana nimitaning Ratu Bali, haneng Usana, haneng ikang kata kamantyan.

Tucapa mwah sira Mpu Mahameru, renes parahyangan ira ring Besakih, iniring Bhatara Putranjaya, tan lingen tusta girang twasnia wang ing Bali Age Kabeh angaturana bakti ke Basakih, ring Bhatara mungguwing tawang, ri kala Purnama Kartika, mwah ri Tileming Kawulu walinira Bhatari Nini ring Dalem Kadewatan, sahananing wang Bali Madya angaturana rin wali ring Dalem, pada wijah ahyas sadulur-dulur, saha tetabehan gong, mwah pali-pali, ya ika karenga de Sri Aji Mayadanawa, wirasaning wang Bali Kabeh, suka twasnia angaturana widhi widhana antya

7.b. sukseka ri twasnia sri aji, tumuli sira sineba, kiniring de tanda mantrinnya makabehan, maka muka Kriyan Patih Bedawong mwang Kala Wong tan hana waneh kinocaran, ulahe wang Bali angaturana bakti, saha widhi widana, tetabehan adulur pali-pali, tumuli sira lunga ke Besakih, tan sah iniring tanda mantrinnya kabeh, mwang lurah kuwu desa, sapraptanira mareng Manik Mas, araryan angadangin wang Bali, tan dwa prapta wang Bali adulur-dulur saha  laki bi, hana anak putu ingemban, amawa pasaji maka mwah widhi widana, tumuli angeling sri aji :

“Eh kita Wang Bali, lunga ing endi pwa kita, angawa widhi widana sregepa”.

Umatur Ki Wang Bali :

            “Singgih Pandewa kawula lunga maring Kayangan Basukih

8.a.     “Ka dalem Kadewatan, angaturana bukti ring Hyang Bhatari”.

Sumahur Sri Aji :

            “Duk kita pareka Dalem, paran ta pinitanta’,

“Kawula nunas tirta sarining tawun, lamakane sidhi rahayu, mwah nunas urip, seger lanus kadirgayusan”

Mangkana atur ikang Bali akweh, Sumahur Sri Aji Mayadanawa :

“Yan mangkana ingong tan suka, jati kamu aja kemo, twi ingong dalem jati, yan ring Dalem Kadewatan, mwah ring Besakih, dudu dewa, dudu Dalem, tan hana waneh, ingong Dalem Jati, mangke aja angaturana bakti ke Dalem mwah Besakih, ingon juga baktinin, aturin widhi widana”,

Pan mangkana mawedi marmania lumintang angaturana widhi widana, mulih asuwang-suwang tangis, duking kala Isyakam 896, tangeh yan wuwusen langgyane

8.b. Mayadanawa ring para Bhatara.

Wuwusen Bhatara Hyang Mahadewa agonita telas wateking Dewata kabeh apupula maring pengastryan Besakih, tan hana waneh kang ginocaran, pan ulahe Mayadanawa momo murka megataken aci, mangke tucapa Bhatara kabeh lunga maring Semeru, umedek paduka Bhatara Hyang Pasupati, tan sah iniring Mpu Semeru, tan cariten awan, dateng maring Sumeru angradana paduka Bhatara Hyang Pasupati, ndah umijil Bhatara, rentehing wara wakyanira :

“Anaku Madewa Gnijaya, paran marmanta pranagata dateng agugah ri kahanan ingsun, luwir asem rudira, lah waraha”

Ndan umatur Hyang Mahadewa adulur panganjali :

“Singgih pukulun Hyang Mami, nghulun aminta lugraha mrastakena-

9.a.     pan Mayadanawa dosania amegataken aci, momo murka, tistis amurna reng kayangan”

Ling Bhatara Hyang Pasupati :

            “Yan tu ning mangkana, sang lugraha, jah tasmat wastu, 5, sida sidhi adnyananta”,

An tar lina Bhatara, neher Hyang Mahadewa angaturana pengalpika, pengastuti, amwit ring Bhatara, umantuka maring Besakih, agya ngeremek pun Mayadanawa, tucapa wus apupul sawateking Dewata Kabeh maring Besakih, mwang Rsi Ghana, Dewa Ghana, maka muka Sang Hyang Indra, mwah sawateking Bhatara ri Bali kabeh, tumut sira Sang panca Pandita minakadi nikang perang, lewih sanjatanira saking anjadma, Sira Mpu Gnijaya asanjata I Baru Tinggi, sira Mpu Semeru asanjata I Baru Angin, sira Mpu Ghana asanjata

9.b. I Mpu Galuh, sira Mpu Kuturan asanjata I lebur Jagat, sira Mpu Pradah asanjata I Ujan Arintis.

Gumuruh suaranikang sangka, umung sanjaya-jayanikang dewata maring dirgantara. Kunang karungu De Sri Sri Aji Mayadanawa, apan wus telas dinuta, agya kon anabuh punang teteg agung, dateng kang para strinira makabehan, saha gagaman sangkepa, kahiring dening Bala amawa sanjata, gumuruh swaranikang tatabuhan, surak wanti-wanti, luwir karungweng akasa, pangerik ikang kuda, maka mukanikang perang, Si Rakriyan Apatih Kala Wong, prapteng wanantara, apapagan awan, apaguteng kang kala, aperang ocak-ocakan lewir segara rudira agunung kunapa, tangeh yan kawarnaha gatinikang perang, pejah Sri Aji

10.a. Mayadanawa, jina ya ring rana, tumut patihira kang ingaranan Patih Kala Wong ring Pangkung Patas, andadi tawulan, wetu tang rah bilang sandinia, sinapa de Bhatara, ingaran We Mala, tatemuaken mangke, ngaran, Tukad Patanu.

Muwah nimitaning hana sinengguh Tirtha Empul, mwang We Cetik, nguni duking Baladewa kapepesan, keh pejah hana ring Pagulingan kena wisyane dening Mayadanawa muwang Kala Wong, weruh ta sira Bhatara keni pangindra warih, agya angeregepaken sidhi adnyana, neher tinancebaken tan umbul-umbul umijil ikang tirta Maha Mretha, maka anguripi Dewata pejah mangkana kajarnia ring sana, katama pitekaning mangke.

Mwah wasitakena sabrastane Sri Mayadanawa araryan Bhatara

10.b. Tiga Sakti maring Bedaulu, angulih-ulih lampahing lagha, wusing mangkana, umantuk Bhatara kabeh maring parwata Mahameru, mwang maring Swarga Loka, Bhatara Putranjaya mantuk maring Besakih, iniring de Mpu Mahameru, telas para Bhatara umantuking kayangan ira sowang. Maring Giri watukaru, maring Giri Bratan, maring Pejeng, maring Giri Andakasa, mekadi Bhatara Hyang Gnijaya, mahireng umantuk maring Giri Andakasa, mekadi Bhatara Hyang Gnijaya mahireng umantuk maring Giri Lempuyang, sira Sang Catur Pandita, telas mantuk maring Yawa Sumeru, sama tusta rena para Bhatara maniti maring yoga, apan wus telas mala mareng madyalika, mangkana pidartania nguni ring Usana.

Pira kunang antajinikang kala, hana ta wara wakyanira Bhatara Hyang Pasupati ring sira Sang Panca Pandita.

11.a. Ndya ta lingira :

“Putungku makabehan, waknanta linganing pangrega, aywa lupa ambeking kaparamartan, putusing kepanditan, titi kamoksan, mwang Aji Taksaran, yan mingkene, nas mingkene, putus panugrahaning Bhatara, nimitaning Aji Taksaran kabeh, soring manu, tri kaya maring sudaru tattwa dyatmika, wekasnia yan hana pretisentananta, pawaraha juga ya, pawarah nghulun mene, nimitaniang kengetakena lingning titi gagaduhan, mwang pandita para marta, ayuwa lupa sentananta, ento-ento kita tan tindihing lepihin, dudu sentananta moga-moga ta hya aming sor menadi satriya, mwah kengetakena pahayu sang kamimitan maring Bali, mwah walinira Hyang kawekas”.

Mangkana wakyanira Bhatara angastungkara Sang Panca Pandita angaturakena pengalpika lewih

11.b. restining anta adnyana, lewir kasitaing sanjiwani idep ira, tangeh yan wasita, mangke punggel ikang kata.

Hana manih wuwusen waneh Sri Aji Erlanggya namanira, ratu cakra wretya sarat ring Yawada Nagara, lewih wiryan ira ajerihi sang para nata, kajana priya ring paran-paran, kalania karepat denira tanda mantri makabehan haneng paseban, wasitanen den ira Mpu Genijaya tumurun haneng Yawa Dwipa, tumut arinira kabeh, Sira Mpu Mahameru, sira Mpu Ghana, Sira Mpu Kuturan, nguniweh sira Mpu Pradah, sapraptanira lami ring tinggal iran Sri Aji tumuruning singasana angastungkara, pada anguncarakena weda, weruh pwa Sri Aji tinurunaken Rsi Ghana, neher pwa Sri Aji asung pinari sapa ring Sang Mpu Kabeh, ling ira :

            “Sadnya sang maha pandita…..

12.a. ……Dateng maring endi rahadyan sang nghulun dateng parangke, tar weruh pwa manira ring sira pasang tabe ya pawaraha nghulun duga-duga, lamakanta tan akena kacakra bhawa de Sang Yati Wara”.

Sumahur Sang Brahmana Pandita :

            “Sadnya Aji, tuhu panakwanta ri kami, amnira turun maring Yambu Dwipa, kinon de Bhatara Pasupati wenteneng Bali, maka titindihi Bhumi Bali, pinangku Bhatara Tri Purusa maring Basukih”.

Mangkana ling Sang Panca Tirtha, sumahur Sri Aji :

            “Sadnya Mpungku makabehan, yan tusing mangkana, kaya pangartika Sang Maha Muni, yan pindaning yogya, ayuwa lamuntanging Bhumi Yawada tan waneh pwa sira kabeh, maka cudamani manira tekeng warta mana juga, hana swa tamajan manira setri katrini, anggya manira panguryaga, ring sira kabeh, tulusakena sih ta ring…..

12.b. ….nghulun mangke”

Sumawur Sang Brahmana Pandita, lingira :

            “Sadnya Aji, rahayu dahat wuwusta ring kami, nging sida tgan sida, apa marmaning mangkana, dharmaning,kadi pandita mami, tan kawenang adwa ring sang hyang pasupati-sastra,

andika bhatara uni:

            “tan kineng marahengbali, apan asamun tang bali-pulina, nora hana anunggweng Bhatara Putrajaya maring basukih, kewalya sidi sri aji, samangke ulun karya amuja ring ariningsun makabehan, tusta rena twasnira sri aji erlanggya,

wusing mangkana neher angling sira Mpu Gnijaya:

            “ndya ta linganya nihan, pan mangkana pamidine kaki arya, yan kawenang tan paweh lumintangeng bhumi yawa deha”, yayi kadyangapa, sajnanira samangke,

Tandwa umatursira mpu semeru:

            Singgih ta sira kakang, arinira daweg amwit rumuhun, ri sira kaka,

13.a  turun wentening bali, apan samya maring basukih, nora hana angemit bhatara putranjaya, pekaya ta sirakaka ingkene rumuhun, iniring denirayinira, 3, siki, tangeh ya katakenan, pagonitanira ring sira sri aji erlanggya,”

heneng ikang kala sakareng.

Bawisyati Mpu Mahameru, turun aneng Bali, lumaku tan pamengan, lascarya perapta maring kuntul-gading desaiku, lumintanging giri tuluk biyu, anujur maringbasukih, kala dinten kakawi siwa, titi suklapaksa, pancadasi, julung pujut, sacandra utara palguna, swanita karnita, sirna, nitya, isakyam, jadma sira tmayamuka, 121, sapraptanemaring basakih, umanjing maring paryanganira, tanimba ri Bhatara Putrajaya, mwang Bhatara Gnijaya, sadakala angastungkara,

13.b Bhatara Drakeng cita amangsana yoga, kweh ya ucapeng.

Salawas-lawas tang kala, praptangdentanya, candra-siwa, warapita, titi suklapaksa, ping saptami, Isakyam, 122, turun sira Mpu Gana mareng Gelgel, apang Hyangnira ring palinggih dasar-bhuwana, mangkana nimitanya, kunang sira Mpu Kuturan, tumurun wenten ring Bali, abada uwet ning kapu-kapu, abidak rwaning benda, desa padang, kaladiwe, uda siwa, wara pahang, titi suklapaksa madukara, candra-geni, rudira pawaka, nirsa caksu, isakayam geni suku babahan,

udani dita, 123, neher winangun paryangan maring Giri Silayukti, ayoga nukla

14.a. brahmacari, luwih astitinira mareng dewa astawa, maka muka ring hyangeng basukih, tan katakenan papangadyayanira, sira Mpu Tiga, heneng ikang kata kamantyan.

Kunang kawarnaha malih sang maka catreng pulina Bali, sabrastane Sri Mayadanawa nguni, gumanti abhiseka ratu ngaran Sri Bedamuka, apan matangian apanelah mangkana, apan binasirsa, astana sira mareng rajya Batan Anyar, uni duk sira durung abinamuka, antyan apekik tata warnania, lewir apsara gana yan umpama, apapa sih Sri Tapaulung sakti tanpa inganan, sedakala umanjing mijil maring swarga loka, inituti lepukaning kukus Giri Batur, rep ikang bhawana wetning lewih susaktinia si Rakriyan Pasung Grigis mwang liwar tungkange sira kang ingaranan Si Kebo Mayura

14.b. agenah neng Blahbatuh, apan agul-agul    agung aluhur, tan kesameng-sameng wong, mangkana tattwania nguni, haneng kang kata Sri Bhedamuka mareng Bedulu.

Gunantya kawuwusen sira Mpu Pradah aparhyangan ring Yawada Pajarakan, tan imbangin kaotamanira sang raka, kunang sira Mpu Genijaya, wekasan hana putra 7 siki, wetu saking Bhatara Manik Geni rabinira, putran Bhatara Mahadewa, sang jumeneng maring Tohlangkir, sama wus aparihita, nakira kang panua, abhiseka Mpu Ketek, kang made akakasih Mpu Kananda, kang anwam apasadnya Mpu Wiradnyana. Sang  nging wekas apenelah Mpu Witadarma, mwah arinira, anama Mpu Ragarunting, mwah sang ari apuspata Mpu Prateka, mwah Mpu Dangka pinih alit. Kunang sira Mpu Pradah

15.a. angalap rabi asameten dera Mpu Kanwa, teher aputra kakalih, jalu-jalu paripurna, maler sampun wus apodgala, kang panwa anama Mpu Siwagandu, sang ari akakasih Mpu Bahula, mangkana samodyaning anak sang mpu kalih. Mangke kaweruhana pagonitanira, sira Mpu Genijaya, ring sira Mpu Pradah, mwang nakira sadaya, ndya lewirnia nihan, lingira :

“Yayi Sang Mpu Pradah, kakangira agya aninggali sira turun mareng Bali, umedek Bhatara Putranjaya ring Besakih, apan suwe tan umedeka Bhatara”.

Mangkana ling sang raka, sumawur sang ari :

“Mpukulun Sang Muniwara, daweg lumarisa pwa kaka rumuhun, ring esuk arinta umiring ta sira”

Mangkana atur ira Mpu Bradah, mwah sira Mpu Genijaya awarah-warah ring anak ira kabeh, ling ira :

15.b.   “Anaku sadaya pahenaka juga ta linganing pangerenga, sangke yayah ira agya aninggali sira, tumurun ring Bali Rajya, angemit Bhatara Pytranjaya ring Basukih, kita anaku kabeh aja lupa ring wekasku mangke, ndya ta ya kengetakena ring titi gegaduhan kepanditan amanggehaken aksara kabeh, titi kamoksan, mwang ling ning Rwa Bhineda, sarining nirbhana sunia, tattwa kabeh, ayuwa lupa pawarah manira mene, wekasan hana sentananta saking manita tohen to tan katindihaning lingganing aksara amura ling manira mangke”

Andika Bhatara Nguni :

            “Moga-moga ta ya amungpang alaku, kwehnia prabedania, saluir japa weda ya ta Mpu, mwah wilasaning nanggehana Dharma Kapanditan, tan kawenang kemuteng rajah mwang tamah, rumaketing pancendriya

16.a. “mwang arta mwang irsya, jati drenggi, iriati, ginawe saba drewaka, ika pada tan kawenang, apan dudu ulahing pandita uttama, ngaran, manih ambek kaparamertan, ambek dredasya, ika ika kadarman sang hyang Jana Nuraga ta sira mareng jagat, dita ya saluir wakya sidhi mandi, yan hana wang talpaka ambeknia kena kebajra wisya dening sidhi adnyanan ira, mangkana kengetakena ayuwa lupa “

            “hana malih pawekas manira, aja tan pakedepa, mene yan yayahta prapteng Bali, sembaha juga pwa manira ayuwa lupa, kengetakena katekeng delaha, patirtayan paduka Bhatara Putranjaya mareng Besakih, rikala purnamaning kartika, wenang pretisentanan manira angaturana pujawali, mangkana kengetakena”

Tumuli angastungkara

16.b. anakira mekabehan, adulur pengalpika, garjita, anede anuhun sadnya Sang Hyang Abra Sinuhun, sumusup tekeng antasarira, tangeh ya kajarakena.

Wuwusen ta sira Mpu Genijaya tumurun wenten ing Bali, abda wuwitning kapu-kapu abidak ruwaning benda nuju ring we, sura guru Iswara, pratipada sukla, Sasadara, Wesaka, Swanita pandita muka parwata dik witangsu 1079, warsa dinita, tangeh ya kacariteng awan prapta ring kakisiking Bali, jumujug maring Silayukti, tan dwa katingalan denira yinira, Sang Mpu Kuturan prapta sira sang raka, gipih tumurun sira Mpu Kuturan amapaga sang raka mareng kakisik, menek anembah pwa sira, umatura ring sang raka :

            “Pasang tabeya rakriyan wawu dateng daweg….

17.a. …. Lumarisa haneng parahyangan”

Manggut sang abra sinuhun

            “Lah papareng”,

Tumuli tumurun sang raka sapraptaneng parahyangan sampun sami alinggiha, nora waneh pwa gonitanira sarwa tattwa dyatmika, lingira :

            “ Ahum…”

Mangkana pidartania. Tang katakena pasilih-silihaning gonitanira, nimitania adharma lewih, pirang diyanten ring Silayukti, enjing lumampah pwa sira Mpu genijaya, iniring de yinira Sang Mpu Kuturan lumaku tanpamengan, saksana dateng maring Dasar, tiningalan de Sang Mpu Ghana sang raka prapta, gipih umedek sang raka, tumuli angaturaken panganjali, daweg agya pakanira lumarisa, isa sira yayi Mpu Kuturan, tumuli adandan tangan sang Mpu Tiga, daweg

17.b. Sang Adi Guru lumungguha rumuhun, sumawur sang raka :

            “Lah yayi karuwa, lumungguha pwa sira papareng kakanta “

Wus sampun dateng lungguh haneng parahyangan nora waneh pangonitania lewirning tattwa jenyana, dyatmika kamoksan.

Mangkana kramania tangeh pasilihaning pagonitan, apan byakta rumaga Sang Hyang Suksma Taya, ri wusing mangkana, wuwusan enjing, mwah taya lunga mareng Basukih, tumut arinta maka ruwang sanak, lumakuwa tan pamengan. Tan koningeng awan, saksana prapta maring Basukih, rajua jumujug mareng parahyangan sira Mpu Semeru, tanduwa katon denira Sang Mpu Semeru, ri praptanira pwa sang raka iniring den rayinira maka ruwang sanak, lewih karestyaning

18.a. adnyananta, lewir katibening tirtha maha mretha, mangkana ya umpama, agya sira tumunduk sa ruwi atalangkup, adulur pengalpika, anjaya-jaya winalesan de sang raka mwang arinia maka ruwa, saha jaya-jaya kaya Brahmana Angisep Sari suwaranikang Bajra. Riwusing mangkana, raju matur Mpu Mahameru :

“Pasang tabe daweg alungguha rakriyan rumuhun lan rayi mangkana”

Sumahur Mpu Genijaya :

            “Lah pada alungguh yayi, kakang ira ares kertha lugraha”

Wuwusen sama alungguh Sang Catur Pandita, raju umatur Mpu Semeru ring sang raka, lingira:

“Ri kapan raka rakriyan tumurun haneng Bali, siapa kang umiringa?”

Sumahur pakanira Sang Mpu genijaya lingira :

“Tan hana yayi merakanira dawak, turun-turun wenten neng Silayukti rumuhun…..

18.b. …..tumuli haneng dasar, teher dateng maring kene, neher pasilihaning pagonita, makadi Tattwa Jnyana Dyatmika, sarwa Reg Weda, Ayur Weda satra kabeh, telas kinaweruhan”

Mangkana pidartania muwah, pira kunang kala prapta Purnama Kartika, patirtan Bhatara Putranjaya, tumuli Sang Catur Pandita angaturaken puja wali, tan ucapa ramyanikang yadnya, arsa girang ikang wang pada angaturaken sembah, pratekaning aran punang karya, kang rumuhun Anya Brahma, ngaran, wusing Anya Brahma, Amanca Wali Krama, ngaran, ri wusing Amanca Wali Krama neher angaturaken wali ring parahyangan, Penganggih, ngaran.

Irika Sang Catur Tirtha mayoga Draka angastawa Bhatara kabeh malungguh maring batur pasamuwan agung, ndah tumurun Bhatara Hyang Putranjaya rumuhun

19.a. tumut Bhatari Danu, mwang Bhatara Hyang Genijaya tumurun maring Giri Lempuyang, kunang Bhatara Tumuwuh, turun saking Giri Watukaru, Bhatara Manik Galang turun saking Pejeng, Bhatara Manik Kumayang turun saking Giri Bratan, Bhatara Tugu turun saking Giri Andakasa, sama akumpulaken maring pasamwan kayangan maring Besakih tan danantara riyut pater, angin maderes, sah adulur gelepug ring dirgantara, kilat tatit saha wangkawa, ndah umijil Paduka Bhatara Hyang Pasupati, saking Parwata Semeru apalinggihan Padma Anglayang, ingiring dening Dewata kabeh tumut watek Rsi gana, pupul apanta-panta mwang apsara-gana, widyadara-widyadari, katon tang jong sweta pita warna, umung swaraning genta, tan ucapakena

19.b. restinikang sad kayangan tangeh ya warnakena rarasing punang karya, pira kunang latri, gumanti wus puput punang karya, aluwaran, umantuk Bhatara kabeh maring kayangan sira sowang. Bhatara Hyang Genijaya umantukan pinih ungkur, irika Mpu Kuturan, Mpu Gana, amwit ring pada paduka Bhatara Putranjaya, nguniweh ring Bhatara Hyang Genijaya mahireng, adulur puspa panganjali, wus inugrahan, tumuli amwit ring sang raka, akatakena sampun rawuh ring Silayukti mantuk maring Gelgel.

Kunang kawuwusan muwah manih Bhatara Hyang Genijaya umantuka maring Giri Lempuyang, iniring de putranira sira Mpu Genijaya, teher pwa ingkana Mpu Genijaya aparahyangan, saha yoga semadi Mpu Genijaya mara mundur nga Jawa, nga Bali,

20.a. apan mahawan hyun cet maring Bali nimitania kweh pretisentanan ira karyaneng Yawa, mangkana pidartania nguni.

Riwusing lama-lami, winaliyeng kang kata, wuwusen sira Mpu Ketek arabi anaking Arya Padang Subadra neher ta ya asunu, apanelah Sang Hyang Pamanca, ngaran. Kunang sira Mpu Kananda arabi anakira Mpu Swetawijaya, maler ya ta asuta, apauspata sira Sang Kuladewa, ngaran. Mwah Mpu Wiradnyana arabi anaking Mpu Penataran, asuta ngaran Mpu Wiranata, ngaran. Kunang Mpu Witadarma, rabinira anak Mpu Darmada, aputu de Mpu Yogiswara, aputra, abhiseka Mpu Wiradharma, ngaran. Mwah Mpu ragarunting arabi anakira Mpu Wirana Tanakung, hana

20.b. anakira nama Mpu Wirarunting, ngaran, memper kadya sang bapa namania, mwang Sang Mpu Prateka angalap rabi, anakira Mpu Pasuruan Bang Saneta, ngaran, neher puputa Sang Mpu Sumedang, hana anknia ngaran Sang Mpu Wiradangkya, memper kaya sang bapa namania nguniweh kasidya adnyanan ira sowang, mangkana samodayaning anak sang sanak papitu wuse mungguwing lepihan.

Wuwusen putran ira Sang Mpu Pradah 2 siki laki-laki, sira Mpu Siwagandu, ingalap rabi anakira Mpu Wiraga, neher ta ya asuta 5 siki, setri sekawan, jalu sasiki, listuayu paripurna pratyekaning aran, kang laki apanelah Mpu Witaraga, mwah kan setri-setri, Ni Dewi Ratna Sumeru, Ni Dewi Cemiri Nata, Ni Dewi Patni

21.a. Ni Dewi Sukerti. Mwah Sira Mpu Bahula arabi ta ya de anakira Walu Nateng, Ni Dewi Ratna Mangali, ngaran. Apuputra ta ya 5 siki, setri sakawan laki sawiji, pratekaning ngaran, kang kakung apuspata Mpu Wiranata, kang stri anama Ni Dewi Dwaranika, Ni Dewi Adnyani, Ni Dewi Mreta Jiwa, Ni Dewi Mreta Manggali, ngaran, ika treh Brahma Kula, tan kata kena kabyacaksunira Mpu kabeh, tan imbaknya sang guru reka sila kramanira kabeh, tu,……. Heneng tikang kata sekareng kamantyan.

Manih wuwusen waneh, anakira Sri Aji Jayabaya, Sri Aji Kameswara, Aji Jayabaya, kaputunia Sri Aji Jayakatong aputra Sri Aji

21.b. Kresna Wang Bang, Sri Pramatana Darma Wangsa Teguh Wikrama Ananta Tunggal, Dewa Erlanggya Jayabaya, Jaya Kameswara, paturunan ira panyeneng. Kuna duking Medang, mangkana pidartania nguni ratu maka catraning Pulina Jawa ring Usana, mamgke punggel carita ring Medangkana.

Gumanti hana piteketira sang Saptang Pandita ring anak sisiyanira kabeh sowang-sowang, apa luwirnia, nihan :

“Anaku makabehan, pakenaka juga talinganta pangerenga, nguni hana piteken ira linging Bhatara Kamimitan mayoga maring Bali, ayuwa lupa kita kabeh, wekas yan hana sentananta metu sowang-sowang, nimitania kengeta juga lingning gegadyuhan Brahmanda……

22.a. …….Raja Purana nguniweh aja lupa ring Bhatara jumeneng maring Bali, wenang juga kita umedek ring Bali, ngaturaken penganjali mwang aci, rikala walinira Bhatara nuju Purnama Kartika, angaturana pengastawa katekeng wekasing delaha, yan hana santanan manira toto, amuruga ling Bhatara nguni, moga-moga ta ya, kena kebajra wisya mumpung selaku lampah, twi amingsor pwa kita, nimitania atindihakena wakya Bhatara nguni nguni, mangkana kengetakena lingku mekabehan”.

Tandwa umatur anaknia kabeh, adulur panganjali mwang jaya-jaya, yan mangkana anakta anda anuhun :

“Adnya sang Abra Sinuhun wuwusen wus sumusup katekeng wekasing anta wredaya umiring adnya Bhatara……

22.b. ……..nguni tangeh yan mangkana”.

Tucapa ta sira Sang Mpu Bradah turun sawenten ing Bali, umedek sang raka maring Silayukti, apatya kumaweruha ri kawyadnyanan ira sang raka, mintonaken sidya jenyana, tan koningeng awan, tumurun haneng Silayukti saksana abadawu taru palud, panjangnia samusti, teher umedek sang raka, sapraptania tinon de sang raka, angling pwa sang raka :

“Yayi wawu prapta, daweg agya maring parahyangan, amecikana lungguh”

Umedek ta sira Mpu Bradah tucapa wus tateng lungguh, sinatwa sang wawu prapta, nimitania dateng somya pada angucap-ucap dadya umatur ta Sang Mpu Pradah, lingira :

            “Singgih ta sira kaka matangian dateng…..

23.a.  …….nghulun mangke sitaning nghulun kamaweruha sosening anyanan ira kaka, yan pindaning wenang daweg wetuwaken mangke”.

Sumawur Sang Mpu Kuturan, lingira :

            “ Yan mangkana kakanta tumut karya lingganta, iki hana sata, wawu antiga katrini”

Umatur sang ari :

            “Abecik yan mangkana”

Neher Sang Mpu Kuturan angwatokaken sidhi adnyana, ingaranan punang antiga, lumaku dawak prapta mareng kahanan sang maha Rsi, tumuli tinimpikaken dawak, maka trini antiga ika, angling ta sang raka:

            “yayi, tinarka punang antiga, paran tan wetunia sawiji-wiji”

Umatur sang ari :

23.b. “Singgih kaka, antiga kang ing urda swarania angsa wetonipun”

Ling Sang Raka :

“Bonten, naga wetunia”

Wus mangkana, bentar kang antiga, tandwa angsa wetunia. Mwah angling Sang Mpu Kuturan :

“Yayi, mwah tinarka kan antiga di madya, paran ikang pawetunia”.

Umatur Sang Mpu Pradah :

“Singgih kakang, antiga maring sor rumuhun, gagak petak kang pawetunia ipun”

Tan ucapa bentar kang antiga wetu kang gagak petak anamber angagana. Mwah Sang Mpu Kuturan ngandika :

            “Yayi kari ya sawiji, mwah tinarka”

Lingira sang ari :

            “Singgih antiga iku naga roro wetunia”

Wusing mangkana bentar kang antiga, wetu naga rodra mangang krura kara ngajrihi, asyung tiksna malungid, culania tinuktuk geni, lewir kilat cayanikang geniniya mareng tuktuk tur mangang.

24.a. umiber angagana atuturun maring Basukih, mangkana kata twania, ri wusing samangkana neher sira Mpu Pradah angregep punang aji pangredana, ngaran, Aji Basundari Antasiksa, katon antiga katrini kumambang madyaning arnawa tinimpikaken punang dawak, ndah umatur Sang Mpu Pradah :

“Singgih sang kaka, hana antiga katon kumambang maring telenging segara, wetaning segara, wetaning Gunung Silayukti, yaning pindaning yogya, pilihakena cetana mangko, paran pawetunya, lah durusakena”.

Angling pwa sang raka Mpu Kuturan:

“Kakanta tumut kaya pamidyanta yayi”.

Neher ta ya aglis angeregep punang kasidya adnyana, ngaran Sang Hyang Antasiksa Guwya Wijaya, ngandika Sang Raka :

            “Yayi iku antiga kang rumuhun Kusuma Manca Warna pawetunipun”.

Umatur sang ari :

            “Bonten…”

Neher bentar kang antiga wetu puspa warsa manca warna wanginiya angibekin bhuwana, umatur Sang Mpu Pradah :

“Singgih mwah tinarka punapa kejatinia”,

“yayi iku antiga maring madya, tirtha kamandalu umijil”

Umijil tirtha kamandalu atatakan kundi manik. Mwah Sang Mpu Pradah umatur:

“Iku kari ya sawiji antiga kang paling bawah, punapa kang wetunipun pakenaka kaka mwah cetana mangko”.

Sumahur sang raka :

“Yayi, iku natiga kang paling bawah Badawang nala pawetunipun”.

Neher bentar kang antiga, wyakti kang badawang nala mahelar gringsing wayang, panawat pitola sutra kabinawa. Irika suk katuwasira Sang Mpu Pradah, tumulia sira asung

25.a. brahmantya setya, ling ira :

“Ih kamu bedawangnala apan kita tibeng pritiwi, mangke ketekaning delaha tan kawenang kita ataluwan tengahing samudra maring kakaisik juga atalwan, yan kita atalwan mareng sagara, wastu tan pariwastu katadah dening iwak agung, dosanmu langgiyeng aku”.

Mangkana sapaniya Sang Mpu Pradah tinemwaken mangke, ika nimitane kang penyu atalwan maring pritiwi, keh bedania, wetunia dadi sarpa, impas, cemaning, kakwa, mangkana katattwania tekaning mangke ring atita, pirang dinten ikang kala, prapta we sura guru Wisnu, mwang kawyawahara Siwa, uku Sungsang, Sugya Bali, neher sira umilwa Nyugi Manik, duking mangkana, penamben ikang Sugi Manik, duking mangkana, panemben ikang Sugi Manik Jawa lawan Bali, malar tinemwaken mangke kang sinanggehing

25.b. wang Bali kabeh, Wre……Wa…Jawa. Su….Ka….Bali, saika ketattwania, tageh yan katakena, umantuk pwa Sang Mpu Pradah waluyeng Jawa, wus amwit de sang raka Mpu Kuturan.

Sah Sang Mpu Pradah saking padang mangraris ke Gelgel, maring Dasar Bhuwana tan ketama gonitania ring Gelgel, neher ta ya amwit de Sang Raka ring Gelgel mangraris ke Besakih, tan ucapa pagonitan ira ring sang raka ring Besakih amwit ta ya mangraris ring Sang Raka ring Lempuyang, ngaran. Tan ucapa pagonitanira ring Lempuyang neher ta ya amwit ring sang raka ring Lempuyang, saksana dateng pwa sira Sang Mpu Pradah mareng Jawa Deha, aparahyangan maring Pejarakan, heneng kata kamantyan.

Wuwusan mwah Sang Mpu Kuturan haneng Bali Padang Subadra

26.a. jumeneng akayangan ring Giri Silayukti, tumurun pwa sira ring dik desa-desa awarah-warah silakramaning bhawana rwa, nista madya uttama, lewirnia ngawangun kayangan-kayangan, mahayu pelinggih, bhatara-bhatara ring Bali luwirnia : Puseh, Dalem, Desa Walyagung, Pangulun Swi, sopana hana tata krama maring Bali, ayun sang para Bhatara lumingga maring Sad kayang-kayangan, neher sira umiket silakrama, sakaluiring kraman jagat, madya nista uttama pada wusing nungguakena mareng lepihan, katama maring wong Bali kabeh, katekeng wekasing delaha, makadiniya ling bhatara nguni mungguwing Widhisastra Sangara Yoga tangeh warna kena ucapa pakirtin ira ngerahayuang nagara krama mungguwing usana Sang Mpu Kuturan.

Alawas-lawas ikang kala umantuk Sang Panca Tirtha maring suksma taya rumaga sekala niskala byakta rumaga dewa ring niskala jati, Mpu Genijaya, Mpu Semeru. Mpu Garga, Mpu Kuturan, Mpu Pradah, ika ngaran, Mpu Panca Tirtha. Riwusing mangkana tucapa mwah anak putunira Sang Panca Tirtha kabeh lewih astiti baktinia ring Bhatara, mekadi ring sang Guru Reka ne sampun mantung maring tan katon. Pira kunang sadinten ira ucapa mwah agya prapta Purnama kapat, walinira paduka Bhatara jumeneng ring Basukih irika Sang Saptang Pandita iniring dera anak ira kabeh agonika ulih sasanak ira makadi Mpu Ketek paling luhur, sang Mpu kananda, Sang Mpu Wiradnyana

27.a. Mpu Witadharma, Mpu Ragarunting, Mpu Prateka, Mpu Dangka, tumuli ngandika Sang Mpu Ketek :

“Arinku makabehan mwang nak inghulun sadaya, nimitania Sang Abra Sinuhun wus umantuki taya, ngaran, nguni hana ling Bhatara: mangke age dateng Purnamaning Catur, walin Ida Bhatara ring Besakih cittaning nghulun agya turun maring Bali, umedek Bhatara ngaturana wangsuh pada mwang wali widhi widana”.

Umatur sang ari kabeh, makadi anakira sadaya, ling ira :

“Yan tu niang mangkana nghulun misinggih kaya ling Bhatara nguni umiring lampah raka rakriyan, wenang dandanakena samangke”.

Tangeh yan katakena pagonitanira tucapa mangkin sampun ta ya lumampah iniring dening sanak putra-putrania kabeh

27.b. Abnawa madu sudana, tan koningeng awan tumurun maring kakisiking Silayukti, duking we…ku…je…Siwa wariga gung, titi sukla paksa ping 7 Sa Candra Wesrawana Rudira Naga Sirsa Asti, Isyakam panaga gajah gana witangsu, udanidita 1088 warsaning bhumi.

Sapraptanira sumusur kayangan Silayukti, tulia angastungkara saha weda stawa banyak etangan tu, ma ngiring I, ka, I, ooooooo, na, oooooooo, pu, oooooo, samangkana neher angaturana sembah ri parahyangan ira sang atapa Nyukla Brahmacari riwusning mangka pengastawanira kabeh tandwa hana wakyanira Bhatara Mpu Kuturan saking tan katon, pa ta luirnia, nihan :

28.a. “Anaku mwah putuning nghulun samudaya lewih restinikang cittangku sapraptangira mangke, ndya matangian ngastawa nghulun”.

Umatur Sang Mpu kabeh adulur puspa penganjali :

            “Pasang tabeya ra panak putunku matangian dateng apatya angaturana widhi widana anugi manik Jawi”.

Sumahur Bhatara Mpu Kuturan:

            “Antya ri tustaning nghulun”.

Tumulia asung panjaya-jaya saha puspa warsa tangeh yan warnakena tucapa dateng sadintanya, Wre…Wa…Wara Sungsang neher ta ya Mpu kabeh Nyugi manik ring Besakih rumuhun, wus maring Besakih, maring Lempuyang, Maring Dasar, wus maring Dasar, maring Silayukti mangkana pradatania.

Ri wusing mangkana prapteng dinten Coma Kliwon Wara Kuningan patirtan…

28.a. …pangenem bulanan walinira Bhatara jumeneng ring Gelgel. Kunang ring we Wrespati Umanis wara Dunggulan ngaturana wali ring Bhatara jumeneng ring Lempuyang, irika sira Mpu kabeh ngaturana widhi widana saha weda stawa puspa penganjali. Puput gelaring widhi widana upacara wali bhatara, neher Mpu kabeh ngastungkara puja stawa ngre-ngre ikang do, luwir sadpada angisep santun, umung swaraning genta ndah umijil Bhatara aswagata sinantwa lingira :

“Anak putuning nghulun dateng maring Jawa, sinembah ta nghulun, tuhu-tuhu kamu kabeh anidihaken kaparamertan. Nam Tam Tam Ri Mam Aim, sarwa tirtham pancaksaram, triaksaram sarwa papam winasanam, sarwa rogha winasanam …

29.a. ……sarwa gering sama karanam, Om Kara tirtham dirgayusam Om Ksama swamam parisudamam, Om Om Om Siwa tattwam paripurnam parisudam, suda-suda suda, Om Hram Hrim sah parama siwa ya”

Mangkana katattwania pasungira Bhatara ring sira Mpu kabeh. Byakta luwir kagunturaning Sang Hyang Sanjiwani idepira Sang Mpu sadaya, tan katakena ri wusing mangkana, amwit ta ya kebeh angelaris ke Gelgel, nuju pamacekan agung ring rahina Coma Kliwon Kuningan neher angaturana wali ring Bhatara, nguniweh wangsuh pada, saha widhi widana, awor puspa panganjali angaturaken ring Bhatara Gana angrengreng weda stawa, umung swaraning genta sinawuran dening panjaya-jaya saha puspa warsa de Bhatara, mangkana katattwania.

29.b. Tan katakena prapteng dinten Budha kliwon wara Pahang walinira bhatara sang atapa nyukla brahmacari ring Silayukti, mangraris sira Mpu kabeh maring Silayukti angaturana wali saha widhi widana, an marya puspa panganjalinira angrengreng punang weda stawa umwang swaraning genta sinawuran de Bhatara panjaya-jaya mwang puspa gandaksatam, mangkana duking Silayukti.

Mangke prapta kang we Anggara Kliwon walin Bhatara ring Basukih mwah sira Mpu kabeh mareng Besakih angaturana wangsuh pada saha widhi widana, telas panganjalinira mengastawa Bhatara maring Basukih ring parahyangan agung neher sinawuran kembang agura saha gandaksatam mwang panjaya-jaya tangeh yan wuwusen mengastiti…

30.a. utptinira sang Mpu kabeh wusing mangkana amwit sira kabeh neher umantukeng Jawa heneng kang kata kamantyan. Pira antajin ikang kala sira Mpu kabeh anemu karestyaning jawa, wasita mwah, walinira Bhatara ngatemwang, mwah sira kabeh turun maring Bali, agya angaturana wali, kala nemu sasih ka 5, titi pangelong Pancadasi dina udasiwa ring Ugu, rah bumi teng surya, Isaka Eka Wak Medi Kudara 1111, warsaning rat.

Byatitan dateng maring Bali lumakwa tan pamengan turun mareng Kuntul Gading Desa iku, sapraptanira Mpu kabeh, sinungsung dene wong Bali dusun tani, prasama sinarya angaturana bakti, aturira :

            “Singgih I pandewa sakawula……

30.b. ……..ngaturana wah pala kantun ring jeng hyang”.

Sumawur sang mpu makabehan,

“Yan mangkana suka hulunta ri maha, mangke hana pawarah ingsun katekeng kita kabeh, ingsun agya angaturana wali maring bukpada paduka bhatara maring Basukih, Manca Wali Krama ring Tilem sasih Cetraka. Eh kita wang Bali makabehan maring desa-desa pakraman mangke gawenakena maka dadaha anut sasih apan akweh turun iringan Bhatara Hyang Pasupati maring Giri Mahameru, tedun ngayah maring Basukih, kita wang Bali kena kita asegeh yaning ngangken Sasih Kanem masegeh maring Ai, anemu byantara Siwa, yan sasih ka 7 maring Sad kayangan, yan sasih Kawulu masegeh maring banjar, yan sasih ka 9, masegeh maring catuspata atabuh gentuh ngaran…..,

31.a. ……ayuwa tan mangkana yatnakena wang Bali umiring kaya wakya Bhatara”.

Umatur kang wang kabeh ;

            “Umiring kaya pangartika jeng I pandewa”.

Tangeh yan kinucap. Wuwusan prapta sang maha Mpu kabeh maring Basukih, tan marya angastungkara Bhatara, adulur pengalpika ring wusing mangkana, Bya Anggara Kliwon sasih kanem amujaken her madulur prani maring tirtha, ri wusing mangkana, kala Byantara, Budha Kliwon turun maring Gelgel angaturana segeh maring parahyangan Bhatara kasuhun genep sapari polah, wus mangkana prapta sasih ka 7, ri we Sukra Kliwon manglaris ke Silayukti angaturana segeh ring parahyangan Bhatara sang atapa, puput sapratekaning pesegeh, wusing mangkana praptang sasih Palguna, nuju dina Saniscara Kliwon Byantara mangraris ka Giri Lempuyang

31.b. angaturana pasegeh ring parahyang Bhatara Hyang Genijaya madulur pengastawa puput pratekaning pasegeh. Wus mangkana prapteng kang sasih ka 9 ring dinten, Ca… Ka…pesegeh wang kabeh lewirnia katipat sirikan anut uriping pancawara, prapta tileming ka 9 amwit  maring Lempuyang mangraris ke Basukih irika telasing pamuntat ing pasegeh Amanca Wali Krama, ngaran, lewirniya ikang sesining upakaranya winangun sanggar tawang maring catuspata panggungan amanca desa, widhi widanania sarwa suci ne katur ke sanggar tawang, itik putih jambul, suci petak ngaran mapring mayah, macatur puput upakaraning widhi widana amanca wali krama pakaryan sang brahmana brahma heni.

Muwah caruning lebuh inajengan de Brahmana Siwa lewirnia : Angsa,

32.a. itik walang kalung, wedus, kebo cemeng, sagenten, segeh ring sor inajengin de Sang Sadaka Budha, lewirning tadaha, wresaba ne genten, brangkawes, irengan, sona bang bungkum, mergepati, sata amanca warna, putih tulus, putih kuning, wiring brahma mwang wiring ireng, brunbun kuning genep saha upacaraning widhi widana kabeh, wus puput madudus agung, sira sang ra sakti tangeh yan mangkana, ri wuwus saika neher sira ngastuti sama angawetuaken weda samadi, tancala, anrengreng ikang weda mantra, umung swaraning genta angawang-awang karungweng swarga dibya, awor swaraning Brahma astra, telas turun Bhatara-bhatara maring Jawa maring Bali, makadinira Bhatara pasupati tumurun maring Giri Sumeru umiring watek

32.b. Rsi gana mwang watek Brahma Rsi tekeng dewata kabeh Bhatara Cintya Siwa malungguh maring Padma Anglayang nguniweh Dewa Rsi makabehan, sama anunggang Padma Kancana, rem-rem Sang Hyang Mredangganata, kahemban dening andakara, tan narya matrang warsa, kuwung-kuwung angin maderes sapraptan ira Bhatara, iniring watek Rsi gana dewata kabeh maring kayangan Basukih, sinawuran antuk weda stawa maka puspa warsa katon Bhatara kabeh anguptyanira sang para Mpu kabeh, nguniweh Sri Aji Bedaulu angaturana puspa pengalpika, tumurun wonging Bali kabeh, makadi hyang-hyanging Dewata kabeh angaturana puspa panganjali ring lingganira Bhatara Siwa Cintya tangeh yan ucapakena. (BERSAMBUNG.......)