BABAD I GUSTI PENATARAN

 

Salinan Lontar

BABAD I GUSTI PENATARAN

PRATISENTANA SHRI NARARYA KRESHNA KEPAKISAN

(Bahasa Jawa Kuno)

Murda Lontar	: Babad I Gusti Penataran
Druwe	: Giriya Kawyasastra Besakih
Kasalin olih	: Ida Bagus Bajra
Asrama	: Giriya Kawyasastra Besakih
Puput	: 22 Januari 2018
Kajilid olih	: YDK Bali. 01.2022
Katureksa olih	:

 

1.a. Om, Awighnam Astu Nama Siddhyam

Pangaksamaning hulun ri padaning Bhatara Hyang Sinuhun, sang ginlaring sarining Omkara Ratna Maya, hredaya bhumilayam, pinaka sang Yoghi swaranam, sira ya nugraha ring hanawaka ri purwwanira sang wus lepas, yapwan luputa nghulun ri tulah pamidhi, lwir sawigrahaning mala papa pataka, tan kataman upadrawa de Bhatara Hyang mami, ri pangriptaning kata, tan saking pangartha ri lekasning purana tatwa. Wastu tang para jana sama manwaken hayu, dirghayusha tekeng satreh sakula gotra Santana Shri Nararya Kreshna Kepakisan, namostu jagadhitaya, maka ri purwwakaning purana iki.

Om Wastu tathastu anugraha.

1.b. Kathakna mangke duk unikala, ri pantaraning saka warsa 1274, adhipati Bali Pulina, kang abhiseka Dalem Ketut Shri Kreshna Kepakisan, sira mundering Bali pulina, kang kinabih de sira Shri Nararya Kreshna Kepakisan, kang karatonira ngka haneng Samprangan. Tar simpang sira dening bhusananing kaprabhon mwang sikep kadga Ki Ganja Dungkul, nga, Si Jangkung Mangilo mwang karatala, nga, Si Olang Guguh. Caritranen mangke sira Shri Nararya Kreshna Kepakisan unggwanira haneng pradesa Nyuhaya papareng lawan Arya Wang Bang Pinatih kang madeg Demung. Ri sadakala Dhalem Ketut Shri Kreshna Kepakisan, maka catranikang bhuwana Bali, sira kinabih dening pararya, makadinya : Arya Kanuruhan, Arya Wang Bang, ……..

2.a. Arya Dhemung, Arya Tumenggung, Arya Kenceng, Arya Delancang, Arya Belog, Arya Manguri, Arya Pengalasan, Arya Kuta Waringin, Arya Gajah Para mwang Arya Getas, Si Tan Kober, Si Tan Kawur mwang Si Tan Mundur, ika samudaya kweh nikang pararya duking atitha ngenca lingganira sang prabhu. Wasitanen katha mwah sira Arya Gajah Para mwang Arya Getas dhatengeng Bali duk isaka 1284, kang wekasan juga dhateng Waisya tigang sanak, Si Tan Kober, Si Tan Kawur mwang Si Tan Mundur, mangkana tattwania nguni. Warsiteng mwah ri pamadeganira Dalem Ketut Shri Kreshna Kepakisan, kweh wong desa dusun tar mahyun rikahananira mangdadhya catraning Bali Dwipa, makadinnya wonghing Batur, Campaga, Songan, Kedisan Abang, ………..

2.b. Pingan, Munti, Bonyoh, Taro, Bayan, Serahi, Sukawana, Panarajon, Kintamani, Pludu, Manikliu, Patani, Culik, Tista, Margatiga, Muntig, Got, Basangalas, Lokasana, Juntai, Garinten, Nasi Kuning, Puhan, Ulakan. Simbanten, Asti Bantuwayang, Kedampal, Paselatan, Bantas, Tulamben, Datah, Batudawa, mwang Kutadalem, ika matangiang sira Dalem Ketut Shri Kreshna Kepakisan haneng eittania mahyun awalik mungsya Majapahit, pan rummasha denira tar sidheng anglakoni kaprabhonira, nghing ngka sira Ki Patih Gajah Maddha umaweh ikang sasana ruksa mareng sirang adhipati, mwang sira juga umaweh ikang sikep madurghama, nga, kadga Si Lobar, ngka tumuli sira amaweh ikang wacana, ih kita adhipati Bali, yan hana wong nggawe ……..

3.a. garugada, tar karatala tar kadga dening pinagut, nghing paweha imba kang babecik, astabrata mwang sadguna, glaraken niking sopacara ing kahyangan agung Besakih, mwang ri wetbet rajya Bali kuno, wenang ya rinajak angencani Bali, samangkana piwekasira Ki Patih Gajah Maddha. Rilawas nikang katha, sira Dalem Ketut Shri Kreshna Kepakisan, hana ta garopatnira saroro, kang kapretama, nga, I Gusti Ayu Raras sutanira Arya Gajah Para, kang ngawetwaken atmaja tri kwehnia: I Dewa Samprangan, nga, Agra Samprangan, kang ari I Dewa Tarukan, mwang kang anten I Dewa Ketut Ngulesir. Nghing dampatnira kang karwa apasadnya I Gusti Ayu Kutha Waringin sutanira Arya Kutha Waringin, ngka sira mijilaken kang suta apanelah I Dewa Tegal Besung, ………

3.b. tatkalaning sira wredah nikang yusha, ngka sira inaweh sutanira kang jyesta apasadnya I Dewa Samprangan, sira tar sidheng anglakoni nikang kaprabhon, pan honeng cahyaning hyas hoyeng wwe, duking mangkana sira kajuluk Dhalem ile. Nghing kang anten, kang apanelah I Dewa Tarukan tar mahyun madeging kaprabhon, sira pramasuka ngarcana hyang, samangkana juga kang kapitut, nga, I Dewa Ketut Ngulesir pramasuka twasnalanira angumbara mwang ajajuden. Wasitanen mangke sira Dalem Agra Samprangan tar sidheng mundering kaprabhon, ngka lumaris para tanda mantri mwang patih kinabehan angadakaken sabha, tar waneh kang ginositan praya linuruh sira dalem Ketut Ngulesir …….

4.a. umadegaken hoyeng kaprabhon. Risadakala ika juga sira Dewa Tarukan, ngawiwahaning sanak dharma putranira, nga, Raden Kuda Penandang Kajar lawan sutanira Agra Samprangan apenelah Shri Dewi Muter, ngka kang karwa angemasi antaka dening susaktinikang kadga Si Tanda Langlang, matemahan duka sira Agra Samprangan, duking mangkana sira Dewa Tarukan aninggali kadaton mungsya pradesa Pulasari, nengakna. Warnanen mangke sira Shri Nararya Kreshna Kepakisan ngwalatkara haneng Samprangan, hana suta wijil karo sama jalu, pasamudananing haranira lwirnya: Pangeran Nyuhaya mwang Pangeran Made Asak. Apa matangnia atmajanira kang sulung inaranan Pangeran Nyuahaya, tar waneh pan sira lungguheng Nyuhaya. ……