REGISTER YDK BALI 016-2020

 

 

TUTUR

ANGASTIA PRANA

(Register YDK. 016- 2010)

 

Murda Lontar	: Tutur Angastya Prana
Druwe	: Giriya Gunung Payangan
Kasalin olih	: Ida Bagus Alit
Asrama	: Giriya Kuramas Payangan, Gianyar, Bali
Puput	: Redite,Umanis, uku  Langkir, Pangelong ping 11, sasih Kasa, Saka     1914, Isaka warsa, Juli 1992
Malih kasalin	: Ida Bagus Bajra
Asrama	: Giriya Kawyasastra Besakih
Puput	: Saniscara Kliwon Landep, Tanggal 2 sasih kalima, saka 1932. Isaka warsa, 9 Oktober 2010
Kajilid olih	YDK Bali. 10.2020
Katureksa olih	:
Kapica	:

 

PUPUH GINADA

1.

Iseng-isengan manyurat, nuju dina sukra manis

Warannya uku mrakia, nuju pangelong ping pitu,

Anggen ngelingang matingkah, jadma mijil,

Mangimpasin pepanganan.

2.

Anginge pagehang pisan, apang kapah keni sakit

Dyapin katekaning lara, dadi gelis lunas lanus,

Yaning twara pacing teka, ganti mati,

Maka ada enggalan waras.

3.

yan to kapuruga pisan, sakite tan tuna prapti,

Miwah gaginane tlah, buka ya tong ada tumbuh,

Yadin memanah mlajah, ngusadanin,

Mantrane tampu mejalan.

4.

Nuju reditene lekad, tan dadi mangan be julit,

Miwah kakya ring segara, jangane beligo waluh,

Yan to bakat purugang, manguwuhin

Sakite teka nglebihang

5.

Setata ngebus mrapah, ibuk won mata sakit,

Edan rasa lempuyengan, stata menadi puruh,

Bangkyange sakit menanjal, kayang batis,

Tong taen seger abulan.

6.

Yan di somane ya lekad, masih bratannyane luwih,

Tan dadi mangan be kebo, miwah celeng blang iku,

Yaning to bakat purugang, manguwuhin,

Setata nyakitang basing.

7.

Rumpuh koreng parang belah, ibuk ngemu ngemu sai,

Sarwa bukune maluwang, ring dina anggarne metu,

Be layure to impasang, miwah cicing,

Eda pesan mamuwukang.

8.

Yan to bakat purugang, bangkyange sakit sesai,

Kalih menyakitang basing, langu miwah sakit rumpuh,

Koreng maduluran dekah, enek hati,

Bengka tong logas medahar.