Salinan
Lontar
BABAD
BENDESA ABAN
|
Murda Lontar
|
: Babad Bandesa Aban
|
|
Druwe
|
: Giriya Gunung
Payangan
|
|
Kasalin olih
|
: Ida Bagus Bajra
|
|
Asrama
|
: Giriya Gunung
Payangan
|
|
Puput
|
: Agustus 2002
|
|
Kajilid olih
|
: YDK.Bali.02.2020
|
|
Katureksa olih
|
:
|
|
Kapaica, Katur ring
|
:
|
Om awignamastu
Kacerita
sane riin Ida Bhatara Wisnu malinggih ring Ari Loka, madrue oka lanag kalih
diri. Putra sane pinih duhur maparab Ida Bhatara Mahari, malinggih ring
luhuring akasa, putranne sane alitan mapesengan Ida Bhatara Manganjali, malinggih
ring luhuring samudra. Mungguwing kawentenan putran idane, makakalih wikan ting
tattwa-tattwa sane suksma. Samalih kawisesan Ida Sang Kalih, tan sandang
bawosan malih.
Ida
Bhatara Wisnu raris nganikayang putrane makakalih mangda makarya sanjata sane sarwa
mautama. Putrane maka kalih tan pisan purun piwal ring bawos ajin idane. Irika
raris ida makarya sarwa sanjata mauttama ring genah idane sowang-sowang.
Sane
mangkin kaceritayang wenten prabu saking Kolanegara. Mungguwing parab idane tan
seos Ida Sang Prabu Sri Ratna Dewa. Ida wikan ring sahananing daging sastra,
samalih ida kalintang Dharma. Ida maduwe putri adiri sane kalintang ayu,
mapesengan Dewi Sangka utawi Dewi Sangkara.
Rinkanjekan
Ida Dewi Sangka meraga anom, raris ajine Ida Sang Prabu Sri Ratna Dewa
melancaran ring tenggahin segara, ngalinggihin jukung (prahu) Kelangkung ledang
pekayun ida nyinggak iwaknyane mawarni warni, ageng alit, sami kambang ring
kanirmalan toyane telengin samudra. Lancer pamargine malancaran tan wenten sane
nyantulin.
Yan
kudang rahina suwen ida lalila cita ring telengin jaladi, tan pajemuga jag
rawuh angin baret maduluran antuk kilat miwah gereh mangrudugan. Angin baret
ngalinus tan kabinawa, ngewetuwang ombak ageng kadi gunung. Saantukan asapunika
tan pariwangde kaampehan perahun idane. Resah wiyakti pekayun ida, raris sang
prabu kambang anglayab kaanyudan antuk arus segarane...........
